لهفة مشاعر جادالله عثمان

جيت بلهفة مشاعر داير اشوفك
اصلي ظمآن داير اشرب منك اروى وتاني اشرب بكفوفك
جيت اشوف بستان هوانا وداير اشوف خضرة جروفك
هل ذبل زهرك في بعدي والا ازدانت قطوفك
لا كتبت وراك رسائل ولا قريت بعد حروفك
ولا قصيد بعدك قصدت ولا عزفت بعد عزوفك
لا الربيع بعدك غشاني ولا الورود ورتني فيها
ولا الرياض بسمت عشاني ولا الجمال الشفتي فيها
وراك ضيعت الاماني وغيري ما بكى زول عليها
لا دريبا عرفتو تاني ولا رجعت وفزت بيها
حتى توب صبري المقطع بي وراك كملتو كلو
الا عرضي بقالي مقنع وريدي عازل ما وصلو
وين حقولك فيها ارتع وفي هواك الشوق ابلو
وبي جنانك يبقى منبع منو اشرب ما بلو
وين صباحاتك تغرد فيها اسراب القماري
وين غماماتك بترعد تروي جواي الصحاري
وين زهيراتك تفرهد تاني في ساعة العصاري
وين نسيماتك تعربد تلهو ترقص في خداري
يا سلام لو تصفى لي الدنيا من بعد المآسي
ابقى جنبك يا بنية في الصباحات والاماسي
احكي ليكي وتحكي لي عن ليالينا القواسي
نمسح الدمعة الروية ونبني دنيا بلا مراسي