قصيدة اريتو الشوق : الشاعر الفاتح ابراهيم

أريتو الشوق

أريتو لو الشوق زى البريد بيطوف

أنا كنت يا خلاي سويتو فى مظروف

سطرت بى دمي أجمل وأرق حروف

وعنوتو لى إنسان ملك السمع والشوف


زولاً بريدو شديد كان لى مسافة طوف

فى لجة الأحزان وكتين ملانا الخوف

بهواهو يا خلاي ودغدغ هواهو الجوف

ما استغلا هواى مع إنى بيهو شغوف


علمنى كيف الريد نبنيهو طوف فوق طوف

ونتحدي للآلآم ونتجاوز أي ظروف

أصلو البريد ياناس غير زولو ما بيشوف

لو جابو ليهو الحور قدامو ماشه صفوف


أريت وصالنا يدوم ما يبقى بينا عزوف

نوصل مراسى الريد بعد الشقى المردوف

أنا اصلى يا خلاي بين الخلوق معروف

زولا بريد الناس ودايماً قليبي شغوف


أنا نفسى أشيد دار بالريد دوام مسقوف

لى كل زول مظلوم ردا الحبيب مكسوف

وأكتب على بابوا تعبير دوام مألوف

يا صاحبى لا تحزن فى الدنيا نحن ضيوف






واظل احلم ان اكون كما يود احبتى